الموضوع: -مشروع صغير- تربية المواشي

السلام عليكم ورحمة الله وبركاتة ..

من اسبوع تقريبا ..ييت علي بالي هالفكره بتربيه الماشيه ..والاعنتاء بهن حتي يقوم بتكاثر ويزداد الانتاج من عدد الماشيه ..

بعد مايزداد العدد من الماشيه ..سأقوم بيعهن ..كما تعلمون بانه لحم مطلوب ..ويمدحونه اذا كانت ذبيحه الدار ..

امنوه عنده نصايح بخصوص هذا مشروعي الصغير ؟ او افكار او عن واقع تجربه ؟

هل هوه مربح ودخل جيد لي ؟

وانا في انتظاركم ..

مرحبا اخويه ماشالله مشروووع واايد حلو ومربح على حسب المنطقه

الفكره حلوه بما انا نحن بدو نعرف تربية المواشي وما يخلى بيت من زريبه للمواشي ..

اذا الفكره مشرووع طبعا بيكوون ربحه مضاعف ..كيف؟؟

في وااحد عندنا في المنطقه مسوي هذا المشرووع والصرااحه ربحه رهييب ...مسوي زريبه مجزئنها كذا جزء ...يشتري من الجزر ويطعمهم ويسمنهم ..ويشتري من الحريم في المنطقه صغار المعز ويطعمهم ويسمنهم... وجزء للذبايح الي تنفع للضحايا يعني يشتريهم قبل بفتره عشان يسمنون زين.. وكل شي بسعره طبعا الذبايح العربيه اغلى ... محطي عاملين للتنظيف والطعام واحد منهم باكستاني للذباح ماشالله عليه مايسوي للذبيحه كاني ماني والريال هوه يشرف على شغله برووحه يعني اغلب الوقت يالس عند الزريبه مسوي جلسه والي ايي يختار الذبيحه ويدخل يتقهوي لين يخلص ذباح هذا قبل قرار لازم فحص الذبيحه ..انته ممكن تتفق وياهم انك تفحص ذبايحك بين فتره وثانيه ويسمحولك بالذبح لانه مربح اكثر ..
بعد لازم تكون المنطقه من الناس الي يذبحون الذبايح في العزايم والمناسبات والاعياد ..مع انا ناس عندنا زريبه لكن مب دايماً متوفره الذبايح ف سيده عند فلان اكيد عنده..

على فكره مسوي دجه للذباح فيه فتحه عشان ينزل الدم طبعاً مسوي بالوعه وانتو بكرامه وجنبه درام ماء ..

هذا راايي وان شالله اكون افدتك بشي والاعضاء مابيقصرون

وعليكم السلام ورحمة الله وبركاته
والله مشروع حلو ويسهم كذلك في التنمية
اذا انت من أبوظبي أنصحك تاخذلك زريبة من من الزرايب اليديدة إيجارها في السنة 3000 درهم و2000 تأمين واذا عندك مزرعة حاول تعتمد على مزرعتك في زراعة الأعلاف وعندك طريقتين إما تشتري عدد كبير من الاناث وتخليهم يتكاثرون أو تسوي مشروع تسمين وتبيع وقت عيد الأضحى لكن حاول تعرف شو أكثر الأنواع المطلوبة عند الناس على ما أعتقد ان النجدي سوقه قوي في الامارات
لكن أهم شي انك تستشير أهل الخبرة

تبا نصيحتي وان شاء الله ما تخيب اذا عزمت على هذه المشروع ابداء فيه قبل رمضان بشهرين لان رمضان والعيد عقبه وعقيبه ييك عيد الاضحى كل مواسم يعني ربحان ربحان والله يوفقك



ارباب

اذا حد عنده خبره ومعرفه يحط

ويخلينا نتعلم

شكلي انا بعد بشتغل بها الشغله

ما تكلف وايد يمكن 5000 درهم واشتغل

والرزق على الله

مرحبا شباب ..

بصراحة انا عندي عزبة وعندي حلال منه غنم و نعيمي ونجدي ومسوي مكس بينهن وعندي بقر

وانتو بكرامة وبصراحة هواية حلوة وممتعة تشغل فيها اوقات الفراغ بس انا مش ماخذ الفكرة تجارة

وبيع وشرى الا على الخفيف لكن اخوي انت اذا تبا تربي وتشتري حلال لازم تحطي في بالك اشياء

كثيرة وهذا يعتمد على العدد الى بيكون عندك واهم شي النظافة اليومية ومتابعة الامراض بشكل دايم

والاطعام المنتظم وعدم الاهمال والكثير غيرها وذا لك رغبة او حد من الاخوان انا على استعداد

لمساعدتهم وليس التجارة معاهم يعني ..

اي معلومات انا حاضر وتعجبني هاي السوالف .. اخوكم حمد

0505800252

تجارة المواشي تجارة الانبياء
والرسول صلى الله عليه وسلم كان يتاجر بالمواشي
وسبحان الله
كل من دخل هذه التجارة ربح ولم يخسر

انا والدي كان تاجر مواشي والحمدلله توفق في هذه التجارة
والله فتح عليه
استعن بالله وتوكل عليه

في صلاتك وانت ساجد لله عزوجل
ادعوبهذا الدعاء العظيم
اللهم اني اسالك الهدى والتقى والعفاف والغنى
واكثر من الاستغفار

المشاركة الأصلية كتبت بواسطة راشد العوضي

تجارة المواشي تجارة الانبياء
والرسول صلى الله عليه وسلم كان يتاجر بالمواشي
وسبحان الله
كل من دخل هذه التجارة ربح ولم يخسر

انا والدي كان تاجر مواشي والحمدلله توفق في هذه التجارة
والله فتح عليه
استعن بالله وتوكل عليه

في صلاتك وانت ساجد لله عزوجل
ادعوبهذا الدعاء العظيم
اللهم اني اسالك الهدى والتقى والعفاف والغنى
واكثر من الاستغفار

بارك الله فيك أخوي وجزاك الله خير

خير الكلام ما قل ودل

بارك الله فيكم اخواني

والله الكل استفاد من ردودكم وتجاربكم ماشالله عليكم

الله يوفقكم ولاتحرمونا من افكاركم وتجاربكم الرائعه

وبالتوفيق لصاحب الموضوع ان شالله في مشروعه والكل ان شالله معاه

السلام عليكم

اخوي انا اختصاصي طب بيطلري وانتاج حيواني

اي معلومه تبيها لايردك الا لسانك

تحياتي للجميع