مرحبا اخوي وليد
يا مرحبا فيك واحيي فيك الغيره على البيئه واهتمامك بكل ما يهم البحر والبيئه البحريه والموضوع مثل ماذكرت مهم للغايه و لازم تنوضع الحلول المناسبه لمواجهة هذي المشكله.
وفعلا من هذه الحلول هي المحميات البحريه وما اكثر المحميات البحريه الي عدنا بس كلها محميات خاصه وممنوع الاقتراب منها
واذا الواحد فكر يسوي محميه او مشد بيتعب من الشروط والموافقات والتصاريح الي لازم يطلعها اما بالنسبه للمواد الي تستخدم في المحميات او المشدات فاعتقد انه موجوده في بلديه دبي بس غاليه جدا والي معروفه باسم الريف بول وهذي تعتبر افضل نوع للحياه السمكيه افضل بيئه لتربية الاسماك
اتمنى آلية استخراج التصاريح اقل تعقيدا وذلك في النهايه بيعود بالفائده على البيئه البحريه والفائده الشخصيه لصاحب المشد او المحميه


الريف بول

السلام عليكم ورحمة الله وبركاته
اشكرك اخي الكريم على الترحيب
وبصراحة الجمعة الماضية من هذا التاريخ طلعلنا البحر للحداق وكنا في هذا المكان نصيد صيد طيب شعرى وجش وقرفى ودردمان احيانا
لكن امس بصراحة ماحصلنا شى في هذا المكان
وين ما نسير نلاحظ وجود قراقير واذا ماشفنا العلامات نلاحظ ان خيوطنا تشير في حبال الشواح
ماادري اظني البحر كله قراقير
مقابل الخان وانته ساير لين المراكب

السلام عليكم ورحمة الله وبراكاته
هلا اخوي وليد
طبعا اعمال الردم والبناء في جزيرة ديره توقفت نهائيا طبعا والسبب معروف
وزوارق الامن التابعه للجزيره غادرت المكان وسيره بلا رده انشاالله
ومثل ما هو معروف انه الجزيره سوت سمك من كل الانواع وبالذات الدردمان والقرفى والجش واذا اتوافرت الييمه اكيد بتتجمع الاسماك الكبيره
وبما انه موسم الالياخ خلص فاكيد بتلقى البقعه كلها قراقير خاصه انها قوعه طيبه ومتوفر السمك فيها

السلام عليكم ورحمة الله وبركاته
الحمدلله والصلاة والسلام على رسول الله وعلى آله وصحبه أجمعين

ياجماعه انا عندي مداخله

المعروف انه هل البحر ماعندهم عماير ولا عندهم شي غير الله والبحر وتتوقعون يبوم بيحصلون سمج بيخلونه

هذا نصيب ياجماعه وكل واحد منى يعرف ها الشي مثلا لو انته وصلت عند مكان فيه سمج بتقول بس وبتروحون عنه

ماظني السماجه فقارى كل شي عليهم ممنوع وبالخصوخ هل دبي السماجه مايقدر يسوي شي كله يزر ومنع بس شو تقول غير الله المستعان السموحه اخواني على الاطاله لاكن لازم اتكلم لاني انا بعد سماج واعرف ها السوالف؟....

وبالنسبه للسمج يخيس ترا ف دبي مايخيس السمج يوصل السوق على طول يتثلج ويتصدر برع

السموحه مره ثانيه وفمان الله

السلام عليكم ورحمة الله وبركاته


عزيزي

انا في بداية موضوعي قلت انه الهدف من طرح الموضوع ليس محاربة اصحاب المهنه في ارزاقهم بل على العكس السماكه هم اهلنا واخوانا ومن دمنا والي يضرهم يضرنا بس الهدف من طرح الموضوع التوعيه و التنبيه للمحافظه على مصدر الرزق الوحيد لاخوانا السماكه .

انا مثل غيري هاوي البحر اذا رحت اليوم ورجعت بدون صيد ما اتضرر مثل صاحب المهنه الي يغرم البترول والرواتب والمصاريف الثانيه الي ما تنتهي واذا رجع هذا اليوم بدون ماالله يكتب له نصيب بتكون راحت من كيسه والله يعوض عليه.

وبالنسبه لكلامك صحيح اذا الواحد لقى صيد ما يتركه بس لازم اتكون هناك قناعه لانه صيد يوم يمكن يسوي ازمه شهور وهذا الي حاصل الحينه في اسواق السمك في دبي على سبيل المثال الاسبوع الي فات وصل من الشعري 200 درهم منوه يصدق انه بيجي يوم نشتري الشعري 200 ولا كيلو الهامور 75 درهم .

انا اعرف سماكه وايديين ارفعوا طراريدهم على البر من كثر ما يدش ويرجع خالي ليش شو اتغير اكيد انه البحر قل السمك فيه .(( القناعه كنز لايفنى ))

انا اقصد انه يكون تقنين لعملية الصيد من قبل الوزاره والحكومه للمحافظه على البيئه البحريه من الانقراض .والله يكون في عون اخوانا اهل البحر والي يعتمدون عليه في رزقهم .والسموحه

السلام عليكم ورحمة الله وبركاته
كل عام وانتم بخير
والله يتقبل الطاعات
في البداية أحب أشكر الاخوة المشاركين والقائمين علي هذا الموضوع لانه مهم
وأحب اساهم معاكم بالشىء البسيط
أولا: أشوف المد الاحمر ماله صوت ولله الحمد. شو السالفة
ثانيا: بصراحة انا اعرف مجموعة من الناس العايشين على البحر يبدأ في شهر 8 أو 9 يبدأ يطلع القراقير ماله وما يترك إلا القليل
وعند السؤال يتضح لنا انهم يحافظون على البيئة البحرية ويخلون السمك يرجع للمكان ويتكاثر لاجل الموسم القادم
وماقالوا انه خلال هذه الفترة بنخسر، لاكن يفكرون في الموسم القادم حتى يكون مربحهم جيد
لكن المشكلة الناس اللى يتوحون القراقير طول السنة بنفس الاعداد 200 قرقور وطالع
مانقول غير الله المستعان
وعذرا على الاطالة
محب لهذا الموضوع

عفوا قصدي فترة الصيف 5 و 6