يا اخواني حبيت اتكلم عن موضوع وايد مهم ويهم كل واحد يعشق

البحر وهو المحافظه على البيئه البحريه والحياه السمكيه في بحرنا

ومثل ما الكل عارف وشايف ومعاني من قلة السمك والصيد فلابد انه

تكون هناك اسباب ادت الى قلة السمك.في السابق الواحد يدش البحر

بدون محدق معين ويسمر في البحر وماشاالله الخير وايد اما الحينه

تحوص في البحر ومن محدق لين محدق ومن مشد لين مشد ثاني

عشان تقدر تيب حلا بيتك والجماعه الي وياك في الطراد ويدوبك يسد

الكل وساعات ما يسد .محد فكر ليش قلة ثروتنا السمكيه.وعقب كم

سنه بنلقى في بحرنا سمك ولا ما بنلقى.

طبعا الاسباب وايده ومنها على سبيل المثال :

1-تحويل الخليج الى مكب لنفايات البواخر وماي وزيت التبريد.

2-التمارين العسكريه الي تقوم في الخليج والذخائر ال تحتوي على

مواد سامه وتستخدم في هذي التمارين.


3-الصيد الجائر او الصيد بلا وعي.

واسباب كثيره طبعا غيرها بس حبيت اركز على الصيد الجائر لانه

الاسباب الاولى ما نقدر نغير فيها شي.

يا شباب البحر فيه نعمه ونحنا لازم نحافظ على هذه النعمه والصيد

الجائر المقصود فيه الالياخ والهياله.انا طبعا ما احارب السماكه في رزقها

بس يوم من الايام حصلتلي هذي القصه وانتو احكمو عليها.رحت يوم

من الايام لسوق السمك في دبا البيعه في عمان العصر عشان الحق

على المزاد ويوم وصلت السوق شفت منظر اول مره في حياتي

اشوفه.جبال من الصدى والتبان على الرصيف بالالاف.وقفت مندهش

من المنظر وحصلت واحد واقف وسالته المزاد

خلص ورد عليه ماشي مزاد تبى تشيل الوحده بدرهم ونص تخيلو

التبانه بدرهم ونص وكاسرته بعد واتفقت وياه اخذعنه 50 وحده 60

درهم ولكن للاسف مالقيت ثلاجات في المحلات لانه الناس خلصتها

وما خذت السمك.وفي الليل رحت المجلس عند الشباب وخبريتهم

بالقصه وما صدقو وشدو الرحال ثاني يوم على دبا ومودين وياهم اربع

ثلاجات كل وحده تشل ابقره وتريو من 4-7 المغرب ويت كل الطرادات

واللنشات وما غير واحد فيه 6 حبات تبان صغار ويبى الحبه الوحده 60

درهم تخيلو اليوم الي قبله بدرهم وربع والي عقبه 60 والبركه طبعا

في صاحبنا الي خم البحر ونظفه من السمك.الحكم الكم ياخواني

هذي مب جريمه في حق البيئه البحريه. وانتظر منكم المشاركه

والاراء.والسموحه على التطويل.

والله صدقت حرام الواحد يصيد في هل طريقه

بس شو تقول

شكرا على المرور
شكرا اخوي بوسعود على المرور والمشاركه

كفيت ووفيت أخوووي صلاح .. ويعطيك العافيو على الجهد الطيب والمبذول والهدف السامي منه حماية البحر من جهلاء مهنة البحر ..



معلومات قيمه بس من الي يتعض ويعتبر ..



الله المستعان والله يوفقك يارب ويوفق الجميع

صراحه قصه مؤساويه

ومن فتره سمعنا عن الي صاد 9000 سمكه في راس الخيمه ماعرف ام القيوين ماذكر بالضبط ومستانسين بالصيد

صحيح انه صيد وفير بس اكثر هالسمك بيخيس حرام ها سمك لافي يعني خطاف لو لقاله مكان يتكاثر فيه ولا مافيه ضجه ولا حشره بيعيش عندنا بس هالسمك عابر لقلة تواجد الاماكن المهيئه عشان يعيشن

الله المستعان ومشكور صراحه على الموضوع

يستحق الثبيت..

مشكور على المرور
مشكور اخوي الفراغ على المشاركه والمرور واتمنى احساس المسئوليه يكون عند الكل.وتقدير مدى خطورة الصيد بدون قياس.

مشرفنا بن منصور
يزاك الله خير على التثبيت ومشكور على المشاركه والمرور.والقصه الي تقولها صحيحه وصارت موسم الخباط الفايت وانباعت الحبه بدرهم الله المستعان اذا تمت حالة اللا مبالاه هذي شو بيستوي في البحر.

اخواني انتظر التفاعل والمشاركه من الكل والي عنده كلمه اوصوره او فيديو ارجو انه ما يوفرها وخلو الكل يستفيد.هذا الفيديو يثبت الجريمه وانا صورت مكان واحد بس الي فارشين فيه التبان وهناك المنزال مفروش بالكامل تبان من البحر الين الثلاجات.والسموحه التصوير بالتيلفون.


http://uaesm.maktoob.com/up/uploads/81064d2a7a.3gp

هلا صلاح ،كفيت ووفيت عزيزى ،الوزاره تبغى اصلا من يحافظ عليها ، يعنى الكارثه اللى حصلت فى راس الخيمه كتبت عنها كل الصحف ولا اتخذت الوزاره اى قرار بمنع الضغوه لانها دمار البحر، الله المستعان 0

مرحبا اخوي البالول
يزاك الله خير على المرور والمشاركه.والقوانين والاجراءات كلها لازم تتغير والي يصلح اليوم ما يصلح باكر ولازم تتحدد الحصص في البيع عشان السماكه يعرفون الي بيصيد اكثر من الحد المسموح به سمكه بيخيس وما بيحصل حد يشتريه. والله اني في يوم من الايام كنت راجع من الحداق في الليل وقبل ما اوصل الخور ب 7 ميل ولع في وجهي اكثر من عشرين كشاف وحاوطتنا الالياخ من كل وصوب وما حصلت درب ارجع منه الا يوم ريولت كامل على المكاين وقصيتلي واحد من الالياخ في دربي عقب ما حصت اكثر من ربع ساعه ادور درب اطوف منه.وتصدقون واحد من الجماعه عنده ليخ على حسب قوله طوله تقريبا 4 كيلو يعني اذا تاحه في البحر لاتدش وراه شهر لانك ما بتحصل حتى قبقوبه.والسموحه