نسيم المطلعية

انا تعاملت وياهم والحمدالله ماتاخروا عليه في استلام الطلبيه وتوصيلها ..

واحسن شي عندهم خدمة سلم واستلم ^_^

الغلــــــا

احس ل واحد يسوي دعايه للشركه اللي له معارف فيها ههههههويذم الباقي..

خل نكون صريحين ...
انا تاجره من 5 سنين وما خليت شركه ما تعاملت معاها وبتنصدمون من الاسامي اللي بذكرها...

اول شركه تعاملت معاها الارامكس..
اللي تمدحونها وايد...للاسف ما ييون يشلون الطلبيه مني
ولازم اروحلهم..اكمل ساعه في المكتب....يوصلون الطلبيه ثاني يوم صح...بس لو السالفه فيها الدفع عند الاستلام انسى فلوسك....
امبوست كانت احسن شركه بالنسبه لي ايام سلم واستلم...وخلاف صارت سرقه عندهم وما عطونا فلوسنا للاسف وودرنا التعامل معاهم
ايلايت اول الشهور ما شي احسن عنهم بس من اشتهروا وصار ضغط عليهم تعفنوا واخروا طلبياتنا واحترام ما شي وتعالي عندي ويلعبون باسعار التوصيل على كيفهم ...مره 20 مره 30 مره 40 ...وفلوسك يردونها عقب موت
بروفيشنال كنت مخليتنه للازمات ..يوصلون لبعض الامارات بسرعة البرق والامارات الثانيه ببطيء الحلزون ...ويردون فلوسك كاملات لو فيك صبر عقب شهر طبعا....اول الشهور يردون فلوسك خلال 3 ايام ..بس وحده مثلي فوق 60 طلبيه في الشهر ..يقولون لي انسى يا عم تستلمين فلوسج الا عقب شهور...وودرتهم

بس احسن شركه تعاملت معاها ولا عانيت بالمره هي شركة ((تيم اكسبريس))شي جي اسمهم سريعين في التوصيل معامله ممتازه ارجاع الفلوس سريع ...بس عيبهم المندوبين ما يعرفون عربي...وخلاف اختفوا فجاه..؟؟والحينه مااعرف اذا هالشركه توصل او لا

الحينه نبدا الشركات المحليه ...ورجاء اصحابها ما يزعلون مني لانه كلمة الحق لازم تنقال...وانا ما شي في خاطريه صوبهم بس تجربه ولازم اقولها..

راك اكسبريس تعاملت معاهم يمكن 6او 7 شهور مااذكر ...المندوبين جدا خلوقين ومحترمين ....وكانت الطلبيات تتوصل اول باول..بس عيبهم على ايامي ما كان شي كوبونات فلهالسبب ما كنت اعرف شي عن طلبياتي....ويوم اقول طلبيه مااستلمت فلوسها كانوا يقولون عندنا مكتوب انج مستلمه وهالشي ضايقني لاني سالت كذا وحده وقالوا لي نفس الشي..وبعدين يوم وقفت التعامل انصدمت انهم ردولي طلبياتي فوق ال16 او 20 طلبيه ..مبهدلات ...العطور مجبوبه..الغراش مكسووره..والله يلست اطالعهن والغصه في قلبي...يعني ما سد ما وصلوهن فوق هذا ردوهن لي مبهدلين .....بس ما دقيت لهم ولا قلت لهم شي لانه اسلوبهم محترم فتستحي تقول شي..وقلت العوض بيد الله وربي بيعوضني.....

ابديت مع هوت لاين ..من شهر 12...وكل الامور طيبه والمندوبين ما شي احسن عندهم..توصيل سريع ...يلعوزون الزبونات شويه بس المهم ما يتاخرون اكثر عن 4 ايام...يردون الفلوس اول باول...كل شي مسجل عندهم في السيستم ...وعندك نسخه من طلبياتك ..وحقك ما يضيع ...للاسف الزين ما يكمل حلاه ....لين شهر 5...لاحظت تاخير في التوصيل....والسبب انه دخلنا في الصيف وبعض المندوبين سافروا....وعلشان الحق عمري قلت بوقف شهر لانه انا روحي بسافر ...وبالفعل وقفت ..وهم ما قصروا وصلوا كل طلبياتي وردولي فلوسي والحمدلله ....
والحينه بديت مع شركة انطلاق....احلى ما فيهم ييوني لين البيت ..ومندوب بوظبي والعين ما عليه كلام وحتى دبي...بس انصدمت في طلبيات راك والفجيره من اسبوعين ولا وصلوهن ..؟؟فقلت خلاص يا الغلا ما لج نصيب ووقفي...ووقفت الحينه وطلبت منهم يردون طلبياتي لين يرتبون امورهم ويحطون مندوبين لامارات الشماليه ...

والحينه يالسه حاطه ايدي على خدي وتجارتيه موقفه ^_^

من اخر مواضيع العضو: الغلــــــا
* شو رايكم في الموقف اللي تعرضته له من قبل محل في العين ؟؟؟
* شو احسن نوع من موبايلات سوني اركسون؟؟

حوراء للعطور

انا قلت لكم بكتب تجربتي مع راك اكسبريس


بصراحه
ابقى على مينونك لا اييك اين منه


قلت يمكن يوصلولي بسرعه
لاني يوم اطلب من بعض التاجرات يطرشون لي بسرعه يومين واستانس
ومندوبهم واااااااايد خلووووووووووق حليله

بس المصيبه هو من راك
وانا من دبي

يمر دبي 3 ايام فالاسبوع بس لمنطقتي
ويوم سيارته خربانه
ويوم المسؤول خلاه يسير منطقه ثانيه

وجي
يعني
تأخير الطلبيه مب اقل عن اسبوع !!!!

لكن لو طلبته عشان يطرش طلبيه لراك بيوصلها نفس اليوم
باقي الامارات لا
تاخير × تاخير

وااايد تبهدلت وياهم والله







فخلوني على هوت لاين
المشكله مندوب دبي بيسافر شهر 7
للاسف هذا احسن مندوب في الشركه كلها ومحترم جدا فبيسافر
الله يعين
مو مشكله
انا ماخذه صيفي واقدر اوصل الطلبيات لين الشركه كل يوم لان الشركه في دربي
لكن اهم شي عندي ما يتاخرون عالطلبيات

هم عيبهم ان يكسرولي غراشي
ويتاخرون في تسليم النقديات واايد
اكثر من 10 ايام
مو مشكله البيزات

اهم شي الطلبيه توصل للكستمر سليييييمه


فخلوني على هوت لاين احسن حتى زبايني يقولون خليج على هوتلاين لان يوصلون في 3 ايام او 4 بالكثير



الحمد لله شو نسوي بعد
واحد من زبايني يبا يفتح شركة توصيل
بيسوي فيني خير ههههه

حوراء للعطور

خافي ربج اختي تقولين نصابين
في ذمتج ان شاء الله لين يوم الحساب !!!!

ها نظامهم ما بينقص من جيسج شي يا حرمه
انا اتعامل ويا هوت لاين من شهور طويله قريب سنه

نظام الفواتير تشترين من عندهم 10 فواتير بـ 250 درهم

الزبون اوريدي بيدفع قيمة التوصيل 25 درهم
فاذا طلبيتج بقيمة 200 درهم
انتي تحطين عليها 25 درهم فبتكتبين على الفاتوره 225 درهم
يعني بيزاتج بترجع لج
الشركه تاخذ قيمة التوصيل مقدم
وبعدين الزبون يعطيج اياها

يعني فالاخير انتي ما بينقص من حقج شي
والشركه بتاخذ المبلغ قيمة التوصيل حقها
والزبون بيوصل له الطلب

فليش تالفين عالناس ان نصابين شو ما تخافين ربج انتي !!!


وبعدين هوت لاني الشركه الوحيده فالامارات عندهم نظام حتم على الفواتير
يختمون لج الفاتوره عشان حقج ما يضيع
لو لا سمح الله المندوب قال ان هو عطاج البيزات , تقدرين تشتكين وتقولين للشركه ان ما عطاج البيزات والدليل الفاتوره عندج
هو يختم الفاتوره لما بيشل الطلبيه
وياخذها لما بيعطيج بيزاتج
بالتالي هذا اكثر نظام حماية لحقوقج لا بتضيع ولا حد بينهبج

فاختي اتقي الله في الفاظج ولا تتهمين الناس بالنصب دام محد سرق منج ولا قل شي من جيسج

قولوا الحق لان كل كلمه محاسبين عليها يوم القيامه

تاجر بوظبي

أول شيئ الاسم المستعار واضح مثل الشمس تاجر بوظبي يعني واحد مب وحده
ثاني شيئ الهوت لاين نصابين مب علشان انهم يعطون الكوبون بـ 25 وبدون كوبون بـ 30 لا انتي غلطانه هذا شيئ فيه محضور شرعي يعني بيعتين في بيعه عن أبي هريرة -رضي الله عنه قال: نهى رسول الله -صلى الله عليه وسلم- عن بيعتين في بيعه رواه أحمد والنسائي وصححه الترمذي وابن حبان . ولأبي داود: من باع بيعتين في بيعة فله أوكسهما أو الربا .
ثالث شيئ أنهم يحسبون نفس البضاعه اللي اطرشها مع راك اكسبرس بـ 30 يحسبونها هم بـ 35 درهم للعلم بالكوبون يعني زياده عن راك بـ 5 دراهم .
ومره طرشت بضاعه لزبون في الشارجه ومتعود مع راك بـ 380 درهم ويوم عطيت الهوت لاين البضاعه مب طايع يسلمها الزبون بـ380 ويلس يضارب معاه وتصلي الزبون محتشر علي أنا يتحسب المندوب مالي فكلمت المندوب يا ذكي خذ 380 وخصم ال 5 دراهم علي مافي داعي اتسوي مشاكل مع الزبون.
رابعا من خبرج ان الشركات الثانيه ماعندها ختم يعني انتي تتهمين الشركات الثانيه بالباطل بالعكس اتعامل مع راك وتيني الفلوس لين باب البيت في ورقه مختومه بالتفاصيل والفلوس في ظرف مغلف مب مثل الهوت لاين الفلوس يسلمها في ايدك بوخمس يلس عد لين باجر و مره طرشولي تقريبا 2700 مال زبونه ثانيه مسكينه اتصلت فيهم تخبلو يعني بيدفعونها من جيبهم .
الفلوس اتم عندهم أكثر من 20 يوم وتتصل في المسؤول يجولك سلمتهم المندوب اليوم اتصل في المندوب يجولي أنا أصلا في دبي مب في بوظبي وين الإداره وهذا الشيء اتكرر معاي يومين ور بعض
ومافي داعي اني اتكلم عن المعامله ارجعي لكلام باجي الأعضاء وبتشوفين العجب .
وهذا وزياده صارلي مع المندوب خلال 10 طلبيات بس ولو اكتب ما بخلص .

فرجاء الواحد قبل ما يكتب شيئ يقرأ زين ويسأل عبر الخاص عن تفاصيل الموضوع علشان ما يطاول على الناس تراها مب شجاعه كل واحد يروم يكتب بس النفس ما ترضى هذا الاسلوب .

من اخر مواضيع العضو: تاجر بوظبي
* عندي مشكله مع نوكيا E66
* خصائص شهر رمضان
* كيف تكسب المرأة زوجها وتجعله خاتم في إصبعها!؟

UaE FoX

أخواني شركة FedEx أفضل شركة توصيل جربتها


بس عيبهم الوحيد ان ماعندهم خدمة سلم واستلم


ويوصلون لأي إماره بـ 30 درهم

اذا اتسلمهم البضاعة اليوم .. بالباجر تكون عند صاحبها


هاذي الشركة تنفع للي يعتمد بالدفع عن طريق تحويل البيزات .

والي بيجرب 100%%%% مابيندم

الفراشهـ

تحطيم ..

اولت البارحه خذت من هوت لاين كوبونات

شو اسوي اغلب الطلبات يطلبون طريقة سلم واستلم

بعدني مصدومه


وبصراحه راك اكسبيريس .. مارتحت لهم .. قالي ادفعي 50 درهم عسب التوصيله



مع اني مرتاحه مع امبوست .. معاملتهم بصراحه مافي احسن منهم..الحينا تقريبا اتعامل وياهم من سنه

حتى اييون البيت ويشلون الطلبيه .. وماشالله عليهم دقيقين في التوقيت

يعني اتصل فيهم الصبح يقولون لي الظهر على 12 بنشل .. وفعلا ع 12 المندوب ايي ويشل الاغراض
واذا صار لهم اي ظرف يتصل بي المندوب .. يقول لي انا بتاخر شوي ..

مع العلم انا اتكلم عن امبوست امقيوين .. انا مايخصني في باقي الفروع يعني بختصار محد يتفلسف ويقول لي امبوست فرع الفلاني او علاني مب شي ..


مره تاجره طرشت لي طلبيه عن طريق الارامكس
بصراحه شوي وبصيح .. هندي تم يزاعج علي .. ويقول لي تعالي بروحج للمكاني الفلاني واستلمي اغراضج ..
وانا من الزيعه سكرت الفون في ويهه وتم يتصل اكثر من مره .. الحمدلله اخوي كان في البيت .. وقلت له هامندوب يايب لي اغراض ..
رد عليه وتم يزاعج عليه وقاله تعال البيت بسرعه .. لان اخوي مزاجه كان مب شي وكان يبا يظهر



بس تاكدو من تعامل الهوت لاين .. لاتقول لي حرام مايستوي

الفراشهـ

نفس الامبوست ..

بس على فكره يعتبر شركة فيدكس .. الاولى عالميا في ان نسبة الاخطاء الي عندها

هالمعلومه من عند استاذنا ..

بس للاسف ماعندنا فرع في امقيوين خخخخخخخخ

الحمدلله عندنا امبوست

UaE FoX

اختي انا اتعامل ويا شركة هوت لاين

الصراحه انا ارتحت لهم يعني شغلهم اوكي لين الحين

بس المشكله الوحيده انهم يتأخرون في تسليم البيزات .. يعني احسبي حسابج من اسبوع الى اسبوعين بالكثير عشان تستلمين بيزاتج

ويفضل انج انتي تتصلين وتسألينهم عن البيزات

الفراشهـ

مممممممم

بترياهم كم يوم واذا ماتصلو فيني بتصل فيهم .. صدق فشله

الله يهديهم بس .. ومايلعوزوني

انزين واحد يتبرع ويفتح شركة توصيل .. صدق بندعي له ..