السلام عليكم ورحمة الله وبركاته


يقولك الصيف قرب والسفر حان طاريه الله يعين اللي مفارق حبيبه


اخوكم يوسف النعيمي بدأ يجهز عدة السفر والمغامرة للسفر برا مثل كل سنه

سواء كان تجهيز مادي ولا معنوي


طبعا حبيت افيد الاخوان بهذا الموضوع عشان الكل يستفيد منه وياخذ فيه واهم شي انكم تدعولي بالخير هذا اللي اطلبه منكم يا اخوان الدعوه من القلب ..


مثل ما تعرفون الامراض منتشره في العالم اعرف وايد ناس لغوا سفراتهم السنه وتجهو الى الدول العربية عشان الامراض والاوباء وبصراحه انا واحد من الناس اللي قررت اني الغي سفري السنه واتجه الى بلدي الثاني الحبيب لبنان







طبعا اللي بيقولي ليش اخترت لبنان الجواب بسيط جدا وما يبيله اي تفكير .. لبنان هي فرنسا الشرق الاوسط اوروبا العرب ..


فيها كل شي تشتهيه سواء كان جو طبيعي مع طبيعه خلابه ومناظر خلابه تسحر ناظريها وتجذبهم الى عالم ما ورا الخيال من كهوف مغارة جعيتا الى سهل البقاع والاثار الى زحله عروس البقاع وفيها اشهر مطاعم لبنان منتزه البردوني ... وما ادراك ما البردوني كفايه انك تقعد على الطاوله وتتعشى مثلا والنهر يمشي جمبك هذي بروحها تكفي وتحس براحه يمكن ما حسيتها طول عمرك .. بتقولولي فريا وايام فريا بتقولولي جونية خلوها على صوب هذي بروحه جونية يبالها موضوع بروحها ... هههههههه


المهم اخواني خواتي مثل ما عودتكم دايما بالتميز والمميز هذي خريطة كامله مكتوبه ومرسومه بحذافيرها الى بلدي الحبيبي الثاني لبنان الكرامه والشعب الاصيل ..


طبعا انصح الجميع بالسفر بسيارته الخاصه لاكثر من سبب

الاول : انت ملك نفسك محد يقولك وين رايح ووين جاي ..
الثاني : سيارتك ملكك ما تخاف ان حد يشخطك ومكتب اجار وبطيخ
الثالث : الوقت مالكك محد يقولك الطياره بتطير ولا يقولولك طولنا في السياره بندفع وايد
الرايع : بتزور اكثر من بلد ولو حبيت بتوقف في اكثر من بلد محد يقدر يحكمك ..

اخواني السفر بالسياره له طعمه خاصه ..


نبدأ بسم الله


اخواني مثل ما تعرفون غلط الواحد يظهر من البيت ويقصد السفر وما يكون مجهز نفسه ومجهز سيارته



تجهيزات السفر للسيارة


اهم شي تكون السيارة في حالة جيده وما يحتاي اقوللهم .. شو نوع التشيك .. لكن بشل سريع والاولويات

1- يجب تغير اطارات السيارة بنوعيه جيده برجستن او مشلان .. مع عمل ميزانيه كامله للسيارة (ميزان رود )
2- يجب تغير سيور السياره .
3- تبديل زيت المحرك - لا ينصح بتبديل زيت القير الا اذا كان قديم جدا لان زيت القير يوم تبدله عند بنغلاي يمكن يخربلك اياه وانت ما بتحس بهذا العطل الاب عد فتره من تجربه .
4- تشيك ماي الراديتر والتاكد من فعاليته واداءه .
5- اهم شي في السياره كله مكيف السياره لان مصيبه الجو في السعوديه .
6- ثلاجه صغيره فيها ماي وبيبسي وكاكو ومستلزمات المزه في الطريق تعالو عندي بيبعكم ثلاجه كمبرسر هههههه بسعر خيالي 800 درهم بس .
7- اهم شي سفايف السياره يجب عليك تبديلها عشان تحافظ على سلامتك وسلامت العايله اللي وياك ..
8- فلتر البترول تاكد كم تبديله بواحد جديد .. وهذا تبديله سهل جدا ..
9- فلتر المحرك ومافي اسهل منه وتبديل فلتر المكيف ..
10- بلكات السيارة تبديلها في اي ظرف من الظروف .
11- اصلاح تهريب الزيت والقازقيتات لان على الحر يمكن يزيد تسريب الزيت وهذا يسبب مشكله كبيره الله يعلم عواقبها ..


يليت الاخوان يذكرونا باي شي انا نسيته ..




عمل تربتيك واحسن مكان لعمل تربتيك هو نادي السيارات في عجمان بصراحه اجراءات نادي السيارة في دبي وايد معقد وغالي على الفاضي بصراحه اسف اقول هذا الكلام بس كل واحد ينام على الجنب اللي يريحه بصراحه انا اكتب هذي المواضيع عشان الناس تستفيد وانا اكلمكم من واقع تجربه

للعلم للعلم للعلم بالنسبه للمواطنين السيارات المرهونه خلاص صرحوو انها تطلع خارج الدوله بدون اي مشاكل بدون ورقة فك رهن ولا غير شغل سيارتك وتوكل على الله

انا اقول سوا تربتيك عشان تفتكون من المصاريف الزايده اللي بتدفعونها في حدود الاخوان السوريين .

هذا رقم نادي السيارات في عجمان مع موقعهم بالخريطة :


نادي السيارات عجمان رقم 067448558



بصراحه انا بقوللكم اياها انا شوي شديت وياهم في الكلام وو الخ سولي اياها بسعر خاص جدا 400 درهم تامين لبنان وسوريا .. يمكن يسولكم اياها بسعر 400 فقط سوريا لكن لو لزمتو عليهم بيسونها بسعر 400 لبنان وسوريا .. بس يبالهم كم كلمه حلوه وطيبه وبتاخذون كل شي تبونه بدون زعيج



هذي هي احداثيات موقع نادي السيارات ( عجمان)








بعد ما يتم تجهيز عدة السفر من رد بول للطريج الطويل وعندكم الكتكات اهم شي عشان يعطيكم سكر لان الجسم يحرق كميه كبيره من السكر هذا بالنسبه لي انا احب الكتكات هههههههههه ويوم اكل كتكات بعوضني عن السكر اللي نقص في جسمي ..


تتوكلون على الله وتتحركون ..

من خلال شارع الامارات وتتجهون الى حدود السلع

وبيكون خط سير الرحله كالاتي :-

ملاحظه طول الطريق بتحصلون لوحات استدلاليه يعني لا تحاتون الطريق مامن بلوحات ارشاده ولا تنسون كل نقص البترول تحت النصف يجب تعبيته مره ثانيه لان في محطات بترول تكون فاضيه يقولك مافي بترول خلص تخيلو وهذا الشي حصل معاي اكثر من مره ..


دبي - السلع - البطحاء حدود السعوديه - الهفوف - النعيريه - حفر الباطن - رفحاء - عرعر - طريف -القريات - الحديثه حدود الاردن - الزراقاء الاردن - المعمري حدود الاردن سوريا - درعا حدود سوريا - تتجهون الى طريق بلودان والزبداني - المصنع حدود لبنان سوريا ..


كل شي بيكون موضح بالخرايط تحت :

من راس الخيمه الى حدود الامارات السلع ..





وهذي خريطة من الامارات السلع الى



وهذي خريطة من حدود الامارات السعوديه الى الاردن




وهذي الطريق من الاردن الى لبنان وحمدالله على السلامه مقدا :-





هنالك الكثير من التنبيهات الي لازم تنتبه لها .. وخاصه لو كنت لوحد او وياك عايله ..

تذكر ان الله معك وينك ما تروح واكثر من الاستغفار

1- لا توقف لاي شخص يكن لو شو ما كان .
2- لا تطلب المساعده من اي شخص يكون ( حاول انك تختار محطات البترول للاستفسار والاستدلال حفاظا على نفسك ).
3- لا تسلم جوازك لاي شخص يكون عشان يخلصلك اوراقك ولو سلمت شخص معين خلك معاه وين ما يروح لان ممكن ياخذ الجواز ويختفي او الجواز يضيع مثلا وفي ها اللحظة تاكد ان محد بيرجعلك جوازك وراح تتبهذل بهذله لا صارت ولا ستوت ..
4- انتبه لا تصرف فلوس من الحدود تحسبا للفلوس المزورة .
5- خلك قانوني محد بيكلمك ولا يقولك اي شي ولو حد حاول يتفلسف حاول تاخذه بسياسه اكبر ودايما الكلمه الطيبه خير مفتاح لحل اي مشكله في العالم .
6- حاول انك تصرف 500 درهم من كل دوله تحسبا لاي طاري والدولار الامريكي يمشي وين ما تروح بالنسبه والسعوديه تقدر تستعمل فلوس الامارات لانها تمشي ومرغوبه .
7- خل لبسك خفيف شورت وفانيله وخذ وياك احتياط عشان تبدلها كل 12 ساعه تقريبا ..


الرحله من دبي الى لبنان المفروض ما تكلفك اكثر من 800 درهم فقط ..




التكاليف : -


السعودية


حدود السعوديه تامين 70 درهم ..

وبعدين تبدا تعبي بترول بحدود 30 و 25 و لو كثرت لو كثرت 40 هذا لو ابد فاضي التانكي .. ( 150 درهم) لين الاردن تقريبا


الاردن

عندكم تامين السياره في الاردن (10 دنانير )

وجمارك السيارة في الاردن ( 15 دينار اردني )



سوريا


سوريا .. عندي تربتيك دفعت 750 ليرة سورية تامين السيارة 9 دولارات عطيتهم جمارك للسيارة لان عندي تربتيك .. والتربتيك وفر علي فلوس وايده ... انا انصح كل اللي بيسافرون يسون تربتيك لان يوفر مصاريف الدنيا ...


بعدين عبيت في سوريا 2000 ليره قبل ادخل الحدود اللبنانيه لان البترول في لبنان اغلا ..



وللبقية حديث

مشكوووووور على الموضوع

السلام عليكم ..


حبيت اخبركم طريقة سهله عشان تكون الرحله ممتعه وسهله ..


تظهرون من الامارات الساعه 9 بليل .. توصلون باذن الله حدود الامارات الساعه 1 بليل ..

ومن الساعه 1 بليل تنامون في حدود السعوديه سواء كان في فندق ولا في السيارة لحد الساعه 5 الصبح وتتحركون من الساعه 5 الصبح تتوكلون على الله وتتابعون المسير لين ما توصلون لبنان بها الطريقة تكونون وصلتو الاردن في الساعه 8 المغرب تقريبا وتكملون مسيركم لين لبنان او ترتاحون لو بغيتو في سوريا في الحدود نفسها تنامون شوي في السيارة وتنشون وتتابعون مسيركم لين لبنان وتوصلون الصبح الساعه 8 وتحجزون في الفندق وحمدالله على السلامه ..


هذا لو كنتو شباب


اما لو كنتو عايله يفضل انكم تظهرون الساعه 9 بليل وتوصلون الحدود الساعه 1 بليل باذن الله وترتاحون في الاستراحه وتكملون مسيركم لين حفر الباطن وترتاحون في فندق في حفر الباطن وبعدها تنشون اليوم الثاني الساعه 5 الفجر وتكملون مسيركم لين لبنان وانتو والخير رباعه .. اهم شي انكم تتجنبون التوقف بكثره .. حاولو انكم تتوقفون عشان تعبون بترول بس ..


تحملو تقولون انكم بترتاحون في العراء اذا حسيتو بتعب حاولو تحصلون محطه بترول تكون عامره شوي وتنامون فيها ولو في السياره بس اهم شي تكون محطه عامره وكبيره نوعا ما .. ساكا وغيرها ..

اخوكم يوسف

انا حسب ما اذكر كان عندنا خريطه كامله مع المدن والمسافات
وانشاءالله بعمللها سكان او بحطها

تسلم يا الغالي .. وما قصرت

تقريبا نحن خذنا السفره من ابوظبي لين سوريا 18 ساعه متواصل


واشكرك اخوي على الموضوع

وفي ميزان حسناتك اخوي

جزاك الله خير يا رب

والله يا النعيمي أنك ذيب وما قصرت بهالشرح الوافي .. بارك الله فيك .. وأنا إذا تذكرت أي إضافات من عندي بحطهاااا .
بس تعال .. متى موعد سفرك .. يالحبيب .. ؟؟

وسؤوال .. عالسريع ..أنا من سنتين ما سافرت بسيارة .. وناوي أسافر بإذن الله بالشهر القادم ..

لو تكرمت .. تذكرني .. كيف نطلع من الهفوف .. على الطريق الواصل بينها وبين النعيرية .. واللي يمر
بمنطقة ... حنيذ .. والصرار ...

وربي ييسر لك أمرك .. ويحفظك في حلك وترحالك